User:Satyamsharma11
जननी जन्मभूमिश्च स्वर्गादपि गरीयसी। (मातृभक्तिः देशभक्तिश्च)
अस्मिन् संसारे माता मातृभूमिश्च एवैते सर्वोत्तमे स्तः । बालकस्योपरि मातुः यादृशं नैसर्गिकं प्रेम भवति, न तादृशं क्वापि प्राप्तुं शक्यते। माता बालकस्य कृते सर्वस्वमपि त्यक्तुं शक्नोति । मातुः सर्वदैव एषेच्छा भवति यद् बालकः सदा सुखी समृद्धो गुणगणविभूषितश्च भवेत्। सा स्वीयं कष्टजातं नैव चिन्तयति, बालकस्य सुखचिन्तैव सदा तस्याः समक्ष भवति। अतएव पुत्रस्यापि मातुरुपरि नैसर्गिकमसाधारणं च प्रेम भवति। स बाल्यकालात् प्रभृति मातरमेव सर्वतोऽधिकं मन्यते। बालकस्य कृते मातैव सर्वस्वमस्ति। मनुष्यः कदाचिदपि मातुरनृणतां प्राप्तुं न शक्नोति । अत एवोपनिषत्सु आदिश्यते- 'मातृदेवो भव'। अतएव मनुनाऽप्युक्तम् -
यं मातापितरौ क्लेशं, सहेते संभवे नृणाम्।
न तस्य निष्कृतिः शक्या, कर्तुं वर्षशतैरपि ॥
अतएव मनुष्यैः मातृपूजा मातृभक्तिश्च सर्वदा करणीया।
यो मनुष्यो यत्र जन्म लभते, सा तस्य जन्मभूमिः। जन्मभूमिः मनुष्यस्य सर्वदैव आदरस्य पात्रं भवति। यत्र कुत्रापि गतो मनुष्यो जन्मभूमि सदा स्मरत्येव, तद्दर्शनस्याभिलाषः तस्य हृदये वर्तते। भारतवर्षमिदमस्माकं जन्मभूमिः। भारतवर्ष चास्माकं देशः। स्वदेशस्य कृते सर्वेषां हृदये संमान आदरश्च भवतः । अद्यत्वे संसारे सर्वे देशाः स्वदेशस्योन्नतिसाधने संलग्नाः सन्ति। ते साभिमानमेतद् वदन्ति यद् वयम् एतद्देशीयाः स्मः। वयं भारतीया अपि साम्प्रतं स्वाधीनाः स्मः। सर्वस्मिन् संसारे भारतवर्षस्य साम्प्रतमादरो भवति ।
देशस्योन्नत्यै देशभक्तिभावनाया महत्यावश्यकता भवति। देशभक्तिभावनयैव मनुष्यो देशस्योन्नत्यै यतते, समाजस्योद्धारं करोति, अशिक्षितान् शिक्षितान् करोति, देशस्य दरिद्रतां हीनावस्थां च दूरीकरोति, स्वदेशीयव्यापारस्योन्नति करोति, स्वदेशनिर्मितानि वस्तूनि उपयुङक्ते, आवश्यकतायां सत्यां स्वकीयान् प्राणानपि मातृभूमिरक्षार्थं परित्यजति। यदा सर्वेष्वपि देशवासिषु एतादृशी भावना भवति, तदा देशो नूनमुन्नतिं प्राप्नोति। भारतीयेषु स्वदेशाभिमानः सर्वदा आसीत्, अस्ति च। अस्माभिरपि देशभक्तैः भाव्यम्, देशस्य चोन्नतिः करणीया। लक्ष्यं च स्यात्-
एतद्देशप्रसूतस्य,
सकाशादग्रजन्मनः ।
स्वं स्वं चरित्रं शिक्षेरन्, पृथिव्यां सर्वमानवाः ॥
✍️✍️✍️....
सत्यम शर्मा
शिक्षाशास्त्री द्वितीय वर्ष
अनु.- 22780