User:Jameschhangte/sandbox

KÂMI

Kâmi hi Mizo Kristian zînga mal zaia zai thiam lâr hmasa ber a ni a, mipui zînga mal zaia a zai ngaithla tawh chuan a thiamzia a hrilhfak a ni. Kum 1904-ah Sâmtlâng khuaah a piang a, kum 1913- ah Sakhan Tlângsâng, Tripura-ah an pêm a, an pêm hma hian an chhûngkua hi Kristian an ni tawh. Kum ruk vêl a nihin Kristianah an inpe a ni. A pa hi Chalruma, Râlte Mânglût a ni a, a nu chu Rothluaii a ni.Kâmi hming pum hi sawi dân chi hnih a awma, 'Siamkâmi' tih leh 'Dârrokâmi' tiin. Siamkâmi an tihna chhan chu khaw thar an siam a; mahse, pun lam aiin kâm lam an pan zêl avângin 'Siamkâmi' antianie, an tia. Atûte leh a thlah la damte erawh chuan Dârrokâmi a nie, an ti. A tûte sawi dân hi a pawmawm zâwka ngaih a ni. Sakhan Tlângsângah hian Kristian tlêm tê an awm a, Jampui tlâng lam atangin Pathian thuhril leh tlawhtu an nei zauh zauh thîn. Kum 1919-a Mizorama harhna thleng kha Tripura rama Mizote pawhin an chang hlawma, Kâmi pawhin he harhna hi a chang ve a, a chan dân hi a mak ang reng hle. Thing a phurhna lamah a rilruah Pathian fakna hla a lang tlat mai a, a sa a, a lâm bawk a, a hlim ta hle a. Athing phur pawh a haw tlai phah a, a nuin a lo ringhlel zuia, a lo hau nghe nghe a. Mahse, Kâmi chu tlai lama ei rawng a bawl lain a zai a, a lâma lâm leh taa, amu pawhin a âwih phah ve ta an Zai thiam a ni tih hriat a ni ngai lo va; mahse, harhna avângin a zai thiamzia miten an hre ta a. Sakhan tlâng dunga Mizo Kristian nula awm chhun a nih avângin tirhkoh leh rawngbawltuten an hmêlhriat ta thuai a, Pathian fakna hla sain mite a awi thîn a ni.

1.A mizia Kami hi nula fel leh inngaitlâwm tak mai a ni a. Khual chhia tha dawnsawn a thiama, thenrual kawm a thiam bawk. A nungchang amawia, mi dang tân a theih tâwkin a inhmang thîn. Kum 15 vêl a nih atangin miten a zai thiam tih an hre tan a, a harhna chan hian a nun a timawi bawk a, a thlarau mi bawk nên, Kristiante tân a hlu hle a ni. Lehkha a zir chin hriat a ni lo va; mahse, ziak leh chhiar erawh a thiam tha hle thung. Kaihlek hla leh khawvêl hla a sa ngai lo va, a zai thiamna chu Pathian rawngbawl nân leh kohhranho châwm nân chauh a hmang thîn. Mizo nula Biak Ina solo hmasa ber nia hriat a ni. Zai thiama a lâr zualna chu March ni 24, 1921-a NEIG Mission Presbytery inkhâwmpui, Sakhan Biak Ina a zai kha a ni, an ti. Zai hi a rawngbawlna niin a ngai a, pastor leh tirhkohte rawngbawlna hmunah a țûl angin a zui ve thîn a. Rawngbâwlna tihlutu a ni. Azai hian a bân leh taksa dangte a tiche thîn a, ngaithlatute a tiphûr thiam hle.

2. Rawngbawlna Kâmi hi Pathianin aw mawi tak a pe a, Thlarau Thianghlim harhna a chang bawk a, rawngbawl nên hêng hi a hmang vek a ni. Rawngbawltuten an rawngbawlnaa tel ve tûra an sâwmin a hnial ngai lo va, theih tâwkin a zui thîn a. Thusawituten hla sa tûra ngen bik an nei a nih loh chuan thuchah mil hla, thuhriltu thusawi pui tûr a sa thin. Mi hlim kan tih ang hi a ni ber a, thiamna a dawn chu a petu Pathian tân a tipung nasa a, rawngbawltu chawimawi tlâk a ni. NEIG Mission Presbytery hmasa ber March ni 24, 1921-a Tlângsâng khuaa an neih tumin Pastor Liangkhaia leh Pastor Chhawnate an sâwm a (hêng lai hian tirhkoh an la ni a). Kâmi chuan Kalvari hnehna ropui chu' tih hla a sa a, inkhawm zawng zawng chu an tap deuh vek niin an sawi. Kâmi aw mawizia leh zai thiamzia chu heti hian Pastor Liangkhaia chuan a ziak a: "A zai mawizia ka tehkhin ber chu, li pui zau takah, tiau lung phêk tha ver vawra lailên tui pal an han ti a, a pal phei zet zet, a ti zing telh telha, leh urhsunzia khân mi a hneh lo thei lo a ni," tiin. A zaiin mi a hnehna a zuhral thin ang hi a ni ber mai. A zai thiam dân chu...a zai mawizia chhan hi a zai thlarauah a chêng a, amah aiin a awmpuitu thlarau malsâwmna a chang niin a lang. Hetiang zai hi chuan ngaithlatute thinlung a khawih thîn rêng a ni. 3. Pasal a nei Kum 1923-ah an khaw tlangvâl Kristian tha tak Saithankhûma (Pangkaia an ti bawk) nên an innei a, fa paruk an nei a, an fate hi rawngbawltu tha tak tak an ni hlawm. A pasal nên hian rawngbawlna ngai hlu mi an ni. Bru tirhkoh atân an inpe a, kum hnih chhûng an thawk. An chhangchhiat tâk deuh avângin tirhkoh hna chu an bânsan a. An upat lamah an fate nên Tuidam, Mizoramah an rawn pêm a, an awm hlen ta a ni. Kâmi hian a aw mawi tak chu Pathian rawngbawl nân a hmang reng a, a theih chhûng chu Pathian fak nân a aw a hlân a ni ber e. Tichuan, December ni 22, 1990 khân a fak thin Lalpa hnênah a châwl ta a ni. Kâmi, zai thiam, Thlarau Thianghlimin a khawih hi Pathianin a hmang nasa hle a. Zai mai duh tâwk lova bân phara Pathian a fak hian mite thinlung a hneh thîn a, rawngbawltu a zui thinte pawhin Pathian malsâwmna an chan phah hial a ni. Pathianin talent a pêk, a petu chawimawi nân a hmang hi ringtu tih tûr ropui tak a ni ngei mai.